Less is more

2006-07-03T22:37:00.000Z

Smá ferðalag...

Ég ætla að færa mig yfir á www.123.is/ester í alla vega mánuð.
Langar að prófa það. Ef mér líkar ekki nógu vel kem ég aftur hingað.

Þið vitið hvar þið finnið mig.
Kv. Ester

2006-06-29T17:51:00.000Z

Vandamál - Smandamál

Ég er hinn mesti snillingur í að gera vandamál úr engu. Svo dæmi sé tekið að þá hef ég gert hið rosalegasta vandamál úr því hvort ég eigi að skella mér á Landsmót hestamanna núna um helgina eða ekki.

Gaman að segja frá því...

EM

2006-06-27T00:01:00.000Z

Maður svíkur ekki loforð vísvitandi er það !?!

Ég lofaði Önnu Heiðrúnu fyrr í kvöld að ég skyldi blogga svona til tilbreytingar. Málið er ekki að ég nenni því ekki... heldur gleymi ég því. Held því samt alltaf statt og stöðugt fram að um leið og læri heimasíðugerð og kemst á eigin svæði að þá mun ég afreka mun meira í þessum efnum.

En út í aðra sálma. Anna mín heimtaði reyndar ferðasögu, en þar sem hún er nú ekkert svona sérstaklega krassandi að þá ælta ég bara að hlaupa yfir þetta á aðalatriðum.

Við hjónaleysið skruppum s.s. á dögunum til Svíþjóðar og Danmerkur. Aðal ástæða ferðarinnar var fertugsafæmli hjá honum Anís, en hann varð einmitt 40 ára núna 15. júní síðastliðinn. En það var s.s. fjölmennt frá Íslandi í veisluna og haft mikið gaman. Systir mín og fjölsk. búa í Ingered sem er afskaplega lítill og rólegur bær tengdur Ålingsås sem er ca. 30 mín ferðalag með lest frá Gautaborg. Þar var dundað sér í göngutúrum, siglingum og svamli í vatninu í nokkra daga. Einnig fórum við í Lisegarden, Tivolíið í Gautaborg og skoðuðum svo borgina aðeins.
Eftir 5 daga í Svíjalandinu tókum við svo rútu frá Gautaborg yfir til Kaupmannahafnar og stoppuðum þar í 3 daga. Fórum í dýragarðinn, siglingu um "sýkin" og drukkum bjór á Strikinu. Þetta var allt saman voðalega notalegt og gott. Ég var ekki alveg tilbúin til að fara aftur heim. En svona er þetta bara. Adam var ekki lengi í paradís!

Þetta var nú frekar súr saga, enda kannski ekkert mikið merkilegt að segja frá. Meira svona notalegar fjölskyldustundir og dásamleg rólegheit. Alla vega þá eru systur-synir mínir alltaf jafn frábærir. Sá yngsti ný kominn á lappirnar og hleypur eins og skriðdreki um allt. Sá elsti orðinn allt of fullorðinn ;-) og Sindri í miðið stækkar allt of hratt. Kannski er þetta vegna þess að maður sér þá svona sjaldan þessar elskur að manni finnst maður vera að missa af þeim. En alla vega fyrir fjölskyldur og tengda aðila ætla ég að skella slóð á síðunna þeirra hérna til gamans: www.barnanet.is/aprildrengir Svo þarf ég nú að skreppa aftur í október, en mín kæra systir og mágur eiga einmitt vona á sínum fjórða dreng (eða það segi ég að minnsta kosti) um mánaðarmótin sept/okt. Þvílíkur dugnaður í þessu fólki. Ýmsir ættu nú að taka sér þetta til fyrirmyndar ;-)

Framundan er svo bara vinna, mér til mikillar mæðu. En maður reynir að hamast við að nýta helgarnar vel. T.d. skreppa í útilegur, heimsækja vini og vandamenn um allt land, hjóla af sér slenið (nota bene - á nýja hjólinu mínu) og fá fólk í heimsókn. Eða eitthvað bara... alla vega fyrir mestu að nota sumarið vel, hvað sem maður kann að eyða því í ! Kannski ég noti eina helgina í það að hjóla upp í Borgarnes. Æ Ester þeg... ekki orð um það meir, þetta var léleg hugmynd.
Núna ætla ég aftur á móti að fara að sofa, en áður en ég hætti langar mig að spurja ykkur hvort þið hafið horft á fræðsluþáttinn í ríkissjónvarpinu í kvöld. Hann heitir "leyndarmál kynjanna" og fjallar um þann grundvallar mun sem er á körlum og konum. Þetta var hluti I af þremur og var farið í muninn á heilastarfssemi kynjanna. Áframhald verður næstu tvö mánudagskvöld, ég mana ykkur í að horfa á þetta. Mjög fróðlegir og skemmtilegir þættir.

En núna... Natti natt *smúss*
Ester pester

2006-05-19T14:48:00.000Z

NEI HÆ !

Ég viðurkenni að það er svoldið langt síðan síðast. Hvað um það að þá er ég enþá að bíða eftir einkunum úr prófunum... Veit ekki hvort ég er spennt eða kvíðin. Kannski er mér bara sama. Alla vega þá er alltaf nóg að gera. Er búin að vera mikið á fundum og námskeiðum í vinnunni undanfarið og svo bauð ég mig víst fram í ritnefnd starfsmannafélagsins og í kvöld þyrfti ég að mæta í diskó-keilu í kvöld til að geta skellt einhverri vitleysu á miðilinn okkar.

Oft er maður í vafa hvað maður á að skrifa hérna. Nú væri til dæmis við hæfi að ræða Eurovison keppnina og/eða Silvíu Nótt, en ég ætla ekki að gera það. Aftur á móti langar mig til að nefna afmælistónleika Bubba 06.06.06. Ég var of sein að panta miða í stúku :-( veit ekki hvort ég meika að vera í stæði. Var í stúku á White Stripes tónleikunum og leist ekkert á alla þvöguna sem ég horfði á fyrir neðan pallana. Ég yrði nú fyrir vonbrigðum ef Bubbi næði ekki að toppa fjöldann á þeim tónleikum.

En helgi fram undan. Mikið vona ég að hún verði ánægjuleg.
Lífið leikur ekki við alla.

Retse

2006-04-23T16:21:00.000Z

Ákvörðun tekin...

Í dag tók ég þá ákvörðun að ég ætla ekki að taka þau 2 próf sem ég á eftir í III hluta verðbréfanámsins þetta vorið. Ákvörðunin er tekin á þeim grundvelli að ég hef ekki lagst nógu gaumgæfilega yfir þetta efni til þess að treysa mér til að ná 7 eða hærra í einkun eins og til þarf... og svo þarf ég hvort eð er að taka próf í lögfræðinni í haust svo ég gæti ekki útskrifast núna í vor. Það er útskrifað einu sinni á ári svo stefnan er að gefa sér betri tíma í þessa útreikninga og klára þetta vorið 2007. Hef loksins náð að sætta mig við ágæti þessarar ákvörðunar.

Annað sem ég gleymdi að segja ykkur frá í gær var að ég gerði mér ferð í Borgarnesið til þess að skoða nýja útlit útibúa KB-Banka. Borgarnes var s.s. fyrst í röðinni og er útibúið mitt næst og ég verð nú bara að segja að ég er nokkuð spennt fyrir þessu. Alla vega finnst mér þetta mjög flott en á auðvitað eftir að koma í ljós hvernig þetta kemur til með að ganga upp.

Ég ætla að athuga hvort ég geti eitthvað aðstoðað Haukinn minn í lestrinum... því að sjálfsögðu fer hann í prófin.

Ble ble... EM

2006-04-22T23:00:00.000Z

Blogg dagsins

Ég ætla að byrja á slæmu fréttunum. Þannig er mál með vexti að hún systir mín var lögð inná spítala í Alingsås á miðvikudaginn var. Í ljós kom að hún er með heilahimnubólgu. Enn er verið að rannsaka hana til að útiloka að hún sé með "bakteríu-týpuna" af sjúkdómnum, en allt bendir til þess að hún sé með vírusinn sem er víst öllu betra. Fóstrið á ekki að skaðast ef svo er því hún er komin það langt á leið. En alla vega var hún flutt á annað sjúkrahús sem er í Borås og er með sérstaka deild fyrir heilahimnubólgu-sjúklinga og einnig mjög góða fæðinga/meðgöngudeild, svo hún er vonandi í góðum höndum stelpan. Ég talaði við hana síðast um hádegið í dag og henni leið bara alveg sæmilega vel. Þeir voru allir feðgarnir á leiðinni í heimsókn til hennar og var haldin smá afmælisveisla fyrir strákana Ívar Loga og Sindra á spítalanum, en þeir eru 11 og 7 ára í dag bræðurnir. Til hamingju með það strákar mínir :-)

Annað er að bróðir minn er staddur í Barcelona... ég átti símtal við hann bæði í nótt og svo um kvöldmatarleitið áðan og hann er að skemmta sér alveg konunglega og fór fram á það að um leið og hann kæmi heim mundum við bóka ferð þangað saman því þetta væri algjör paradís. Ég er meira en til í það!

Nú eru tvö próf búin og tvö eftir.
Ég hef ekki verið að standa mig eins og ég vildi í próflestri og ætli útkoman verði ekki samkvæmt því. En það kemur allt í ljós. Erfiðustu prófin eru eftir svo nú fara næstu dagar í það að liggja yfir skuldabréfa og afleiðu útreikningum. Frábært!
En allt verður þetta að baki kl: 20:00 27. apríl nk.
Mikið hlakka ég til.

Ein staðreynd um mig í lokin:
Ég mundi aldrei þora að vera leigubílsstjóri.

Nóttin - Ester

2006-04-18T21:22:00.000Z

Nú er sko vorið komi...

með öllum sínum kostum og GÖLLUM sem því fylgja.
Það var þannig að ég brá mér út á svalir í blíðunni. Hrindi eitt símtal og nældi mér svo í bjór sem fyrir einhverja undarlega tilviljun var á svölunum hjá mér (úps Kidda... ég er að drekka bjórinn þinn) til að slaka á eftir 4 tíma langt próf sem ég hef nýlokið við að þreyta í lögum og reglum á fjármagnsmarkaði. Sem sagt... þá hafði ég nýlokið símtalinu og var að virða fyrir þetta annars ágæta útsýni sem ég hef hér í Gnoðarvoginum þá ræðst að mér þessi risastóra ófreskja !!! Í skelfingu minni ræðst ég á svalahurðina, ríf hana upp, stekk inn með tilheyrandi látum og hálshnykkjum. Aumingja Haukur vissi ekki hvaðan á sig stóð veðrið þegar ég brussaðist nánast í gegn um hurðina eins nett og ég get nú verið og skellti henni aftur með ópum.
Já... þetta var hnefastór hunangsfluga, loðin, svört og gul!

Já... það skal ég segja ykkur að vorið er greinilega komið með öllum sínum kostum og göllum.

Blessir... hræddster.

2006-04-15T14:04:00.000Z

Jahh... hvur andsk. og það í miðri dimbilviku.

En hér á bæ er engin sérstök gleði. Prófin byrja á þriðjudaginn og það gengur ekkert allt of vel að læra verð ég nú bara að segja. Einhvað ber á smá athyglisbrestum þegar setjast skal við lesturinn og stend ég mig nú bara býsna vel í því að finna mér eitthvað annað að gera !!!

En þetta tekur allt enda... bara spurning hvernig þetta endar.
Það var kalkúnn á nesinu í gær og svo verður brunað í lambið í Borgarfirðunum á morgun. *estersleikirútum*

Þarf bara að koma einu framfæri hér;
Í nótt og í morgun voru fjöldamargir árekstrar og útafkeyrslur vegna hálku í Reykjavík og nágreni. Hvað finnst ykkur um þetta?

Ætla að hella mér í lestur á lögum um fjármálafyrirtæki nr. 161/2002
Endilega segið skoðun ykkar.

Ester

2006-04-03T22:42:00.000Z

Sakleysi barnæskunnar - Það er af sem áður var

Nú er svo komið fyrir að þær fallegu sögu sem maður heyrði hér áður um fiskana í sjónum hafa hopað niður af stalli sínum. Ég sit hér með tárin í augunum yfir því hversu vond, góðu dýrin mín eru. Í kvöld var stund sannleikans. Ég komst að því að háhyrningar eru hinir verstu morðingjar og eru svokallaðir úlfar hafsins á meðan hákarlar eru hin mestu gæðablóð eins og sjá má meðal annars á vísindavef Háskóla Íslands; "Alls eru skráðar 42 tegundir hákarla sem ráðist hafa á menn, báta eða önnur sjóför á síðastliðnum fjórum öldum, þar af eru 24 tegundir sem vitað er að hafi gert slíkar árásir oftar en þrívegis. Þess má geta að hross og gæsir hafa á sama tímabili ráðist mörgum sinnum oftar á menn". Hvað eru þið að segja mér? Keikó er mannæta... og hákarlinn í Tinna bókunum er jafn meinlaus og gúbbífiskur !?!
Nú bíð ég bara eftir að einhver segi mér að Bangsapabbi hafi í raun étið Gullbrá.

Sjáöldur mín eru að fyllast af tárum svo hér læt ég staðar numið í kvöld.
Góða nótt börnin mín og látið nú engan ljúga í ykkur svona sögum sem koma svo harkalega í bakið á ykkur eftir nokkur ár.

Nóttin, Ester

2006-04-02T22:39:00.000Z

Jah hérna hér.

Þá er komið líf í bloggarann í mér.
Það er ekki til góð afsökun fyrir því að blogga ekki svo ég ætla ekki einu sinni að reyna við það. En svo ég segi nú upp og ofan hvað hefur á mína daga drifið undanfarið þá er kannski skemmst frá því að segja að við erum flutt í stærri íbúð :-) Svo skruppum við til Amsterdam um miðjan Mars og skemmtum okkur konunglega alveg. Mikið að sjá þar skal ég segja ykkur og er þetta eitthvað sem mér finnst að allir ættu að gera einu sinni á ævinni alla vega.

Svo er hún systir mín á landinu eins og stendur með alla fjölskylduna. Yndislegt að hitta þau. Ég get ekki hugsa þá hugsun til enda að þau séu að fara aftur eftir viku :-(

Ég vildi bara láta vita að ég væri lifandi...
Strax eftir páska taka svo við próf...
Ég læt frá mér heyra...

Ester nýbúi.

2006-02-22T21:21:00.000Z

Já ég veit, langt síðan síðast :-/
En alla vega að þá var ég klukkuð !
Ég ætla ekki að halda neina ræðu um skoðun mína á þessu klukki sem gengur manna á milli en langar þó að segja eitt: Hver er tilgangurinn? Ég get ekki ímyndað mér að nokkur maður/kona hafi gaman af því að vita þessa hluti um mig JÁ; Gaman væri að einhver gæti svarað mér um tilganginn.

En hún Linda klukkaði mig á blogginu sínu og ég skorast ekki undan því svo hér koma upplýsingarnar:

4 störf sem ég hef unnið um ævina:
Sölukona hjá Firmaskrá Íslands
Gámþjónusta Vesturlands, almennt skirfstofustarf og losun rotþróa.
Hitt og þetta hjá Eðalfisk hf.
Afgreiðslukona hjá 10-11 Borgarnesi

4 kvikmyndir sem ég gæti horft á aftur og aftur:
Hafið
101 Reykjavík
Robin Hood, men in thights
Herkúles, með ísl. tali

4 staðir sem ég hef búið á:
Borgarnes
Langárfoss
Hreðavatnsskáli
Reykjavík

(eins gott að það eru ekki fleiri en 4, ég hefði lent í vandræðum)

4 sjónvarpsþættir sem mér líkar:
House
House
House
House

(já mér finnst dr. House kynþokkafullur og ég horfi ekki mikið á sjónvarp)

4 staðir sem ég hef heimsótt í fríi:
Svíþjóð (nokkrir bæir)
Kaupmannahöfn (í 4 klst)
Kveldúlfsgata 26 (alltaf gott að fara til múttu)
Akureyri ;-)

4 síður á netinu sem ég heimsæki daglega:
Innra net KB-Banka
Icex.is (vefur kauphallarinnar)
mbl.is
sib.is

4 matarkyns sem ég held uppá:
Kjöt í karrý (Linda ég er ekki að herma, en þetta er best!)
Íslensk kjötsúpa
Nautasteik (Rosalega eigum við vel saman Linda mín)
Saltfiskur

4 staðir sem ég vildi heldur vera á núna:
Hjá minni kæru systur í Svíþjóð
Komin til Amsterdam (nenni ekki að bíða til 16.mars)
Hjá múttu í dekri
Heima þar sem ég er. Hef það of gott til að geta óskað mér að vera annars staðar.

4 bækur sem ég held uppá:
Sjáfstætt fólk
Símaskráin
Íbúatalið (var alltaf gefið út heima)
Dagbókin mín

4 sem ég ælta að klukka:
Fanney frænka
Ingvar bauni
Kristín Helga
Dagný frænka

Jæja ég vona að allir hafi haft gagn og gaman að. Ég vil líka taka það fram að ég verð ekki sár eða móðguð ef þeir sem klikkuðust af mér, ákveða að skorast undan.

2006-01-29T01:06:00.000Z

Hey !

Ég er greinilega eitthvað að vakna... er búin að setja upp myndasíðu það er linkur vinstramegin.
Reyndar bara búin að skella áramótamyndunum inn... en það kemur meira.
Lofa því eftir próf :-)

Ester

2006-01-28T21:03:00.000Z

JÆJA...

Þá er hún Dagný mín búin að laga athugasemda-kerfið hjá mér. Þetta er allt annað líf. Svona lagað pirrar mig gríðalega, kannski hefur það eitthvað með stjörnumerkið að gera.

En alla vega... ég ætlaði að skrifa eitthvað rosa mikið og merkilegt, en þessi færsla hefur dregist eitthvað svo andi hennar er horfinn. Það hefur ekki gengið vel að læra í dag, stefnan er að bróðir minn komi hingað niður í fyrramálið og haldi áfram við íbúðina sem er um það bil að klárast og þá hlýt ég að drattast á lappir og leggjast yfir lærdóm því síðasta prófið er á mánudag.
Já vel á minnst, það er komið nýtt rafmagn í holuna mína svo nú er hægt að kveikja og slökka ljós og stinga eldavélahellum í samband. Tímabært... þar sem það fer einmitt að koma að því að ég flytji úr henni. He he he...

Læt heyra frá mér síðar,
kv. Ester

2006-01-24T21:05:00.000Z

Arrrggg... ég kann ekkert á þessa síðu og það pirrar mig :-

Alla vega er ég í próftörn núna... nóg að gera. Hef ekkert að segja svo ég ætla að athuga hvort Lilja mín fái "skrepp" leyfi af spítalanum. En hún er þar með hann Reynir litla í rannsóknum. Ekki gaman að því...

Adios Esteros

2006-01-07T09:22:00.000Z

Gleðilegt árið !

Já þetta er ég. Ýmislegt drifið á mína daga frá því síðast en til að taka bara síðustu vikur að þá voru jólin fín bara og áramótin dásamleg. Áramótunum eyddum við á Akureyri hjá Lindunni og Jóanum. Þetta var frábær tími í alla staði og sjaldan hef ég náð eins mikilli slökun. Við átum á okkur gat, rosa forréttur a la Jói, svo mallaði Lindan Nautasteik með öllu tilheyrandi í aðalrétt og fengum við svo heita súkkulaðiköku með ís og rjóma í eftirrétt. Úff... þetta var svakalegt !
Linda er búin að skella áramótamyndunum sínum á síðuna: www.nei.is/linda

En nóg um mat og áramót... skólinn er byrjaður aftur eftir hlé og ansi stutt í næstu próf. Hressandi vikur fram undan ;-)
Ég vildi bara aðeins láta heyra í mér. Ég var búin að upphugsa helling af hnittnum sögum til að skella hér inn, en get með engu móti rifjað það upp núna á laugardagsmorgni.

Góða helgi
Ester

Dagurinn í dag...

2005-11-29T20:17:00.000Z

Dagurinn í dag...

...er nú reyndar bara eins og hver annar, engin sérstök uppákoma svo sem. Mig vantaði bara titil á færsluna.

Ég er búin að setja upp aðvetuljósið en er ekki komin jólaskap. Ég gæti sagt ykkur alveg helling en ég nenni því ekki. Það er u.þ.b. þetta sem lýsir mér þessa daganna.

Ég er farin.
Ester

Er ég þá komin til að vera?

2005-11-16T23:36:00.000Z

Að minnsta kosti er ég að skrifa núna. Framhaldið veður að koma í ljós.
Prófin eru búin, ég afrekaði það að mæta í þau öll en ég á ekki von á því að árangurinn sé eitthvað til að hrópa húrra yfir. Á meira von á því að taka þessi próf aftur næsta haust. En þetta kemur allt í ljós vikuna 5-9 des. og hver sem niðurstaðan verður þýðir ekkert að vera dapur yfir því. Þetta er liðið. Geri bara betur næst.

Það er bara nóg um að vera á næstunni... á morgun fer ég heim í nes að hitta stelpurnar. Guffa ætlar að bjóða okkur til sín, það verður líka gaman að sjá litla prinsinn sem þau Pétur voru að eignast. Á laugardagsmorgun er svo skóli, en um kvöldið ætlum við og Brynja og Árni út að borða og í leikhús. Ekki alveg ákveðið hvar við ætlum að borða, en ákveðið er að sjá sýninguna "Halldór í Hollywood" í Þjóðleikhúsinu. Ég hlakka til, hef ekki farið í leikhús síðan við Haukur fórum á hárið í fyrrasumar. Ekki nóg með þetta allt saman, heldur erum við að fara líka á White Stripes tónleikana á sunnudeginum. Allt að gerast þessa helgi lítur út fyrir.

Alla vega... desember nálgast og nóg er að gera í vinnu og skóla.
Þetta er meira svona skyldu-blogg... hef ekkert krassandi að segja svo sem og ekkert sem liggur mér á hjarta að rasa út um. Alla vega ekki sem hægt er að setja á vefinn.
KB-Banka starfsmenn fengu kaupréttarsamning í dag. Ég er að hugsa um að nýta mér hann og kaupa fyrir allt spariféð mitt. Ha ha ha ha ha ha....

Í lokin; þá hefur Dagný gefið út þá yfirlýsingu að hún ætli að laga athugasemda kerfið hér að neðan, svo ekki örvænta, þetta verður allt í lagi.... einhvern tíman!!!

Ble.. em

Ég er ekki látin

2005-11-05T17:47:00.000Z

Já komið sæl,

Ég ætla ekki að gefast upp strax, mér fyndist það lúalegt gagnvart henni frænku minni sem hafði fyrir því að setja þessa síðu upp fyrir mig. Ég aftur á móti á eftir að læra aðeins að leika mér að henni. En talandi um lærdóm... ég er að rembast eins og rjúpan við að lesa undir próf sem eru í vændum 7,10 og 14 nóvember næstkomandi. Ég stórefa að ég hafi mig mikið frammi hér á meðan því stendur og bið ykkur því vel að lifa þangað til.

Með kvíðahnút í mallanum kveð ég í bili.

Ester pester

Jæja jæja jæja

2005-10-22T10:02:00.000Z

Þá hefur hún Dagný frænka mín sett upp fyrir mig síðu í þeim tilgangi að virkja mig í bloggheiminn aftur :-) Takk fyrir það elskan mín.

Nú kemur svo í ljós hvort ég nái að virkja bloggarann í mér aftur... hef reyndar fengið fjölda áskoranna á gömlu síðuna og ætla ég að reyna að standa undir þeim.

Annað sem ber að nefna er að hann Magnús Oktavíus Hilmarsson er 2ja ára í dag. Til hamingju með það litli gaur.

2005-10-18T21:38:00.000Z

Testing